Absolýut söweş çempionatynyň (UFC) ýolbaşçysy Deýna Uaýt ýeňil agramda UFC-niň titulynyň eýesi russiýaly Islam Mahaçew bilen ýarym ýeňil agramda çempion awstraliýaly Aleksandr Wolkanowskiniň arasyndaky rewanşyň olaryň her biri öz agramlarynda söweş geçirenlerinden soň bolup biljekdigini aýtdy.
Mahaçew 12-nji fewralda Wolkanowskini ýeňdi. Söweş Awstraliýanyň Pert şäherinde geçirilen UFC 284 turnirinde bolup, bäş raund dowam etdi. 31 ýaşly Mahaçew emin agzalarynyň biragyzdan karar bermegi bilen ýeňiş gazandy.
“Siz meniň bu söweş barada näme pikir edýändigimi bilýärsiňiz. Haçan-da super söweşi gurnanyňda, şol gün agşam alan netijämizden gowy netijäni göz öňüne getirip bolarmy. Tutuş dünýä kimiň ýeňjekdigi barada jedelleşýärdi. Ýene bir gowy zat, wagtlaýyn titula eýe bolan söweşiji hem ajaýyp çykyşy görkezdi. Indi Ýairiň (Rodriges) Wolkanowskä garşy söweşi bar. Islam bilen nähili boljakdygyny, onuň kim bilen söweşjekdigini hem görübereris. Ýöne Ýair bilen söweşi geçirmek gerek. Şondan soň ikisi-de söweşenden soň rewanş gurnamak bolar” – diýip, Uaýt metbugat konferensiýasynda aýtdy.
Mahaçewiň hasabynda 24 ýeňiş we bir ýeňliş bar. Ol yzygider 12 söweşde ýeňiş gazandy. 34 ýaşly Wolkanowskiniň hasabynda 25 ýeňiş bilen iki ýeňliş bar.
