Britaniýaly milliarder Jeýms Retkliff “Mançester Ýunaýted” futbol klubunda mažoritar paýy satyn almak üçin arza tabşyrdy. Degişli teklip Ineos kompaniýasyndan hem gelip gowuşdy diýip, Reuters habar berýär. Muny incrussia.ru ýetirýär.
2022-nji ýylyň noýabrynda klubuň paýnamalarynyň uly bölegine gözegçilik edýän Gleýzerler maşgalasy “Mançester Ýunaýtediň” geljegi üçin maýa goýumlary çekmek ýa-da öz paýyny satmak ýaly mümkinçilikleri öwrenýändigini habar berdi.
Klubda paý satyn almak üçin arzalary kabul etmegiň möhleti 17-nji fewralda tamamlandy. Retkliffden başga-da, şertnama Kataryň öňki premýer-ministriniň ogly şeýh Jasim ibn Hamad Al-Tani dalaş edýär. “Mançester Ýunaýtede” Saud Arabystanda hem gyzyklanma bildirildi.
“Mançester Ýunaýted” 2022-nji ýylda “Forbes” boýunça dünýäniň iň gymmat futbol klublarynyň reýtinginde üçünjidir. Topar 4,6 mlrd dollar, onuň girdejisi bolsa 128 mln dollar bilen bahalandyrylýar. Klub satylan ýagdaýynda şertnamanyň bahasy 5,2 mlrd dollardan geçip biler.
Jeýms Retkliff Forbes Real-Times reýtinginde 15,3 mlrd dollar baýlygy bilen 111-nji orny eýeleýär. Gleýzerler maşgalasy “Mançester Ýunaýtedi” 2005-nji ýylda 790 mln funt sterlinge (şol wagtky hümmet boýunça, takmynan, 950 mln dollar) satyn aldy.
