Günorta Koreýanyň LG Electronics Inc. kompaniýasy 2022-nji ýylyň dördünji çärýeginde girdejini ýokarlandyrandygyna garamazdan, arassa ýitgini hasaba aldy. Bu barada interfax.ru belleýär.
Kompaniýanyň metbugat relizinde habar berlişi ýaly, oktýabr – dekabr aýlarynda arassa ýitgi geçen ýylyň degişli döwründäki 21,3 mlrd Koreýa wonasy möçberindäki girdeji bilen deňeşdirilende, 212,4 mlrd wona ($172,4 mln) barabar boldy. Girdeji dördünji çärýekde 5,2%, 21,86 trln wona çenli ýokarlandy, operasion girdeji bolsa on esse azalyp, 69,3 mlrd wona boldy.
2022-nji ýylda operasion girdeji 12% azalyp, 3,6 trln wona barabar boldy, girdeji bolsa 12,9% ýokarlanyp, 83,5 trln wona ýetdi.
Durmuş tehnikasyny we kondisionerleri öndürmäge ýöriteleşýän bölümiň girdejisi geçen ýyl 10,3%, 29,9 trln wona çenli ýokarlanyp, taryhy rekordy täzeledi. Awtomobil senagaty üçin çözgütleri çykaryjy biznes girdejini 29,1%, 8,6 trln wona çenli, biznes çözgütlerini işlemek boýunça bölümçe 11,2%, 6,1 trln wona çenli ýokarlandyrdy. Öý güýmenjeleri üçin tehnikany, şol sanda telewizorlary öndüriji bölümiň girdejisi geçen ýyla garanyňda 8,8% azalyp, 15,7 trln wona boldy.
Soňky üç aýda kompaniýanyň kapitallaşdyrmasy 22,8% ýokarlanyp, 16,51 trln wona ýetdi.
