Ýekşenbe güni Stambulda Ýewropada iň ýyndam metro ugry işe girizildi, bu türk megapolisini onuň Ýewropa böleginde ýerleşen halkara howa menzili bilen birleşdirdi. Ýerli häkimiýetiň habar bermegine görä, otlular täze şaha boýunça sagatda 90-120 km tizlik bilen hereket ederler.
34 kilometrlik şahanyň çekilen ýeri bolan Kýagythane bekedinden Stambul howa menziline takmynan 24 minutda baryp bolýar diýip, Türkiýäniň ulag ministri Adil Karaismailoglu habar berýär. Onuň sözlerine görä, täze beketleri birikdirmek bilen ugruň umumy uzynlygy 69 km bolar. "Biz Stambulyň tutuş Ýewropa bölegini gurşap aljak iri metro ulgamyny döredýäris" - diýip, ol TRT teleýaýlymyndaky çykyşynda nygtady.
Ulag ministrliginiň başlygynyň sözlerine görä, geljekde täze metro ugry ýokary tizlikli demirýol ugry bilen birleşdiriler. "Stambul howa menzili Ankaradan gelýän ýokary tizlikli otlynyň duralgasyna öwrüler. Taslama tender geçiriliş tapgyrynda, bir ýylyň içinde bu ugry gurmak boýunça işe başlamak meýilleşdirilýär" - diýip, ministr belledi.
Täze metro ugrunyň açylyş dabarasynda eden çykyşynda Türkiýäniň Prezidenti Rejep Taýyp Ärdogan onuň günde 800 müň ýolagçy gatnatmak üçin niýetlenendigini aýtdy.
