Kadillak amerikan kompaniýasy täze Formula-1 toparyny bellige aldyrmak üçin FIA-a arza bermäge hyýallanýar: ony Andretti Global bilen bilelikde döretmek meýilleşdirilýär. Motorsport-yň berýän habaryna görä, täze topar badalga germewiniň ýanynda 2025-nji ýylda peýda bolsa gerek we onuň düzüminde azyndan bir amerikan sürüjisi bolar.
Andretti sport konglomeraty bilen General Motors konserniniň bileleşigi tabşyryljak arzany taýýarlap başlady: Andretti Global-yň başlygy Maýkl Andrettiniň sözlerine görä, hyzmatdaşlar FIA-nyň ähli düzgünlerini we kadalaryny ýerine ýetirerler.
Arza kabul edilen ýagdaýynda, ilkibaşda Andretti Kadillak topary başga şereketiň hereketlendirijisini ulanar diýip garaşylýar. Şeýle-de bolsa, awtoulag öndürijiniň ýolbaşçylary hususy güýç gurluşyny ösdürmek mümkinçiligini aradan aýyrmaýar.
Täze topar ABŞ-da ýerleşer we Angliýada bolsa aýratyn tehniki goldaw merkezi dörediler.
F1News-yň habaryna görä, Formula 1-iň ýolbaşçylygy Andrettiniň we Kadillagyň meýillerine kän bir höwes bilen jogap bermedi we täze topar döretmek baradaky arzanyň diňe FIA tarapyndan däl, eýsem ýaryş seriýalarynyň ýolbaşçylary tarapyndan hem tassyklanmalydygyny aýtdy.
