Amerikaly wideobloger Jeýk Pol Professional Fighters League (PFL) guramasy bilen şertnama baglaşdy we garyşyk başa-baş söweşde (MMA) çykyş eder. Bu barada ol özüniň YouTube kanalynda habar berdi.
"Men dünýäniň iň çalt ösýän sport ligasy - PFL bilen resmi taýdan MMA-nyň söweşijisiniň şertnamasyny baglaşdym. Men Neýt Diaza iki söweş teklip etdim - ilki boks, soňra alty aýdan soň MMA-nyň düzgünleri boýunça söweş" - diýip, Pol aýtdy.
25 ýaşly Poluň hasabynda boksda alty ýeňşi bolup (dördüsi nokaut bilen), ýekeje-de ýeňlişi ýokdur. Ol 2020-nji ýylyň ýanwar aýyndan bäri professional ringde çykyş edýär. Ol 30-njy oktýabrda boks söweşinde Absolýut söweş çempionatynyň (UFC) öňki çempiony braziliýaly Anderson Silwadan üstün çykdy.
Pol, ilkinji nobatda, bloger we aktýor hökmünde bellidir. Vine sosial ulgamy ýapylmazdan ozal ol bäş million abunaçydan ybarat auditoriýany ýygnapdy. Ol birnäçe gezek internetde iň köp girdeji alýan adamlaryň dürli reýtinglerinde ilkinji üçlükden orun aldy. Bir ýylyň dowamynda ol dürli internet meýdançalarynda 20 mln dollardan gowrak gazanýar.
