Braziliýanyň ýygyndysynyň düzüminde üç gezek dünýä çempiony bolan Peläniň gyzy Keli Kristina Nasimento meşhur futbolçynyň maşgalasynyň onuň aýaga galjakdygyna ynanmagy dowam edýändigini mälim etdi.
Penşenbe güni Peläniň ýagdaýynyň agyrlaşandygy belli boldy. Braziliýaly türgeniň rak keseli beterleşýär, şeýle-de böwregiň we ýüregiň işiniň bozulmasy sebäpli oňa güýçli ideg gerek.
"Biz bärde bolmak bilen, göreşýäris we ynanýarys. Biz ýene bir gije bile" - diýip, hassahananyň otagynda kakasy bilen mähirli gujaklaşyp düşen suratyny Instagramda goýan Keli Kristina Nasimento ýazdy.
Pele 30-njy noýabrda hassahana ýerleşdirilipdi. 82 ýaşly braziliýaly türgene bedeniň umumy çişmesi, ýürek ýetmezçiligi, şeýle hem aňyň bulaşmasy kesel kesgidi goýuldy. Kesel kesgidi 2021-nji ýylyň sentýabr aýynda goýlup, ýogyn içegäniň çişiniň himioterapewtiki bejergisiniň netijelerine täzeden baha bermek üçin, Peläniň hassahana getirilendigi habar berlipdi. Eks-futbolçynyň gyzynyň sözlerine görä, Pele koronawirusdan galan öýken infeksiýasy sebäpli hassahana düşüpdir.
