Turkish Airlines awiakompaniýasy 2023-nji ýylyň ýanwar aýyndan başlap, Stambuldan Türkmenistana gatnawlarynyň awiapetekleriniň bahasyny arzanladar. Bahalar gidiş-geliş 605 dollar möçberinde kesgitleniler. Turkish Airlines-yň saýtyndan petekler onlaýn satyn alnanda bahasy 603,5 dollar.
Mundan başga-da, türk howa gatnadyjysy 2-nji ýanwardan başlap, Stambul-Aşgabat-Stambul we Stambul-Türkmenbaşy-Stambul halkara ugurlary boýunça täze tertipde hereket edip başlar. Bu tertip 2023-nji ýylyň 25-nji martyna çenli dowam eder.
Turkish Airlines şeýle hem 2023-nji ýylyň ýanwar aýyndan başlap, Stambul - Aşgabat ugry boýunça yzygiderli gatnawlarynyň sanyny hepdede 2 gezekliginden 4 gezege çenli artdyrar, Stambul-Türkmenbaşy ugry boýunça uçuşlar hepdede 2 gezek ýerine ýetiriler. Umumylykda, awiakompaniýa Türkmenistana hepdede 6 gezek uçuş eder.
