Turkish Airlines Aşgabada we Türkmenbaşy şäherine ýerine ýetirýän howa gatnawlarynda Türkmenistanyň raýatlary üçin COVID-19-a PZR barlagynyň netijeleri bolan kepilnamany talap etmegini ýatyrdy. Bu barada Orient agentligi awiakompaniýa salgylanyp habar berýär.
Indiden beýläk, türkmenistanlylar barlagy diňe ýurda gelenlerinde geçmeli bolarlar. Mundan öň, Belavia bilen S7 awiakompaniýalary hem şular ýaly düzgünleri girizdi. Turkmenistan airlines hem Russiýadan ýurdumyza dolanyp gelýän raýatlarymyz üçin PZR barlagynyň jogabyny talap etmez.
Islendik awiakompaniýanyň uçary bilen Türkmenistana gelýän ähli daşary ýurtlular üçin uçuşa çenli 48 sagatdan giç bolmadyk PZR barlagynyň jogabyny görkezmek hökmandyr.
Turkish Airlines Stambul – Aşgabat ugry boýunça gatnawlary çarşenbe we şenbe günleri, Aşgabat – Stambul ugurlary boýunça penşenbe we ýekşenbe günleri amala aşyrýar. Stambul-Türkmenbaşy-Stambul ugry boýunça gatnawlar her duşenbe we anna günleri amala aşyrylýar.
