Şu gün Abu-Dabide bolýan Prezident Serdar Berdimuhamedow «Wahat Al Karama» ýadygärlikler toplumyna baryp, Birleşen Arap Emirlikleriniň Watan üçin gurban bolan milli gahrymanlaryny hatyralady.
«Türkmenistan» gazetiniň elektron neşirinde berilýän habara görä, bu ýerde toplumyň ýolbaşçysy Şeýh Halifa bin Tahnun döwlet Baştutanyna «Wahat Al Karama» ýadygärlikler toplumy barada gürrüň berdi. Soňra hormatly Prezidentimiz Hormat garawulynyň esgerleriniň öňünden geçip, ýadygärligiň etegine gül çemenini goýdy we Birleşen Arap Emirlikleriniň milli gahrymanlarynyň hakydasyny hatyralady. Ýadygärlikler toplumyna baryp görmeginiň hormatyna belent mertebeli Prezident Hormatly myhmanlaryň kitabynda ýadygärlik ýazgy galdyrdy.
Arap dilinden terjime edilende «Mertebe jülgesi» diýmegi aňladýan «Wahat Al Karama» ýadygärligi bitewi döwlet ugrunda janyny gurban eden esgerleriň hakydasyny ebedileşdiren gaýduwsyzlygyň we milletiň jebisliginiň nyşanydyr. Olaryň atlary biri-birine direlip duran panelleriň 31-sinde beýan edildi. Plitalarda BAE-niň Liderleriniň goşgy setirleridir aýdan sözleri ýazylypdyr. Meýdany 4 müň inedördül metr bolan ýadygärligiň meýdançasyndan Şeýh Zaýediň adyny göterýän uly metjidiň umumy görnüşi görünýär.
Toplumyň çäginde ýerleşýän Harby şöhrat zalynyň içinde aýlaw boýunça diwaryň ýüzüne BAE-niň gahrymanlarynyň atlary ýazylan 2800 sany alýumin jetwel bar. Her jetwelde gahrymanyň ady, harby ady, goşun görnüşi, wepat bolan ýeri hem-de senesi görkezilen. Binanyň üçegi 8 sany plitadan ybarat bolup, olaryň 7-si Birleşen Arap Emirliklerini, sekizinjisi bolsa ýurduň milli gahrymanlaryny alamatlandyrýar.
