Iki ýyldan Genuýa mugt jemgyýetçilik ulaglary bolan ilkinji Italiýa şäheri bolar. “Ýewropulsyň” habar bermegine görä, Genuýada jemgyýetçilik ulaglarynyň bir bölegi 2021-nji ýylyň noýabr aýynda mugt boldy. Şondan bäri adamlar olardan ortaça 30% köp peýdalanyp başladylar. Şonuň üçin şäher häkimligi şäheriň ýaşaýjylaryny we myhmanlaryny ýol nyrhyny tölemekden doly boşatmak kararyna geldi.
Bu täzeligiň esasy wezipesi global ýylama sebäp bolýan kömürturşy gazynyň zyňyndylaryny azaltmakdyr.
2050-nji ýyla çenli Ýewropada bug gazlarynyň zyňyndylary olaryň tebigat tarapyndan (mysal üçin, agaçlar tarapyndan) galyndysyz siňdirilip bilinjek derejesine çenli azalmaly. Şeýle maksat Ýewropa Bileleşigi tarapyndan esasy sebäpkäri bug gazlary bolan global ýylama garşy göreşiň çäklerinde kesgitlenildi.
Ýewropanyň beýleki şäherleri hem atmosferanyň hapalanmagyna, klimatyň üýtgemegine we ulag dyknyşyklaryna garşy göreşmek üçin jemgyýetçilik ulag nyrhlaryny ýatyrýarlar. Mysal üçin, Pragada awtobuslar we metrolar şäherde goýy tüsse bolan günlerde ýol tölegini almaýarlar. Parižde jemgyýetçilik ulaglary 18 ýaşa çenli çagalar üçin mugt boldy, Brýusselde bolsa gatnaw 25 ýaşa çenli adamlar üçin mugt. Lýuksemburgda ýol nyrhy düýbünden ýatyryldy.
