Ýeňil agramda Absolýut söweş çempionatynyň (UFC) çempiony Islam Mahaçew agram kategoriýasyna garamazdan promouşeniň reýtinginde üçünji orundan ikinji orna galdy. Bu barada guramanyň saýtyna salgylanyp, rsport.ria.ru habar berýär.
Öň ikinji orny şenbe güni Nýu-Ýorkda geçirilen UFC 281 turnirinde braziliýaly Aleks Pereýradan ýeňlip, altynjy gezek orta agramda promouşeniň çempiony titulyny gorap bilmedik Israel Adesanýa eýeleýärdi. Täze Zelandiýanyň wekili dört orun aşak düşdi. Reýtingde birinji orny ýarym ýeňil agramda çempion awstraliýaly Aleksandr Wolkanowski eýeleýär, üçünji orunda ýarym orta diwizionda titulyň eýesi britaniýaly Leon Edwards ýerleşýär.
Abu-Dabide geçirilen UFC 280 turnirinde Mahaçew braziliýaly Çarlz Oliweýrany möhletinden ir ýeňip, ýeňil agramda promouşeniň täze çempiony boldy. 2023-nji ýylyň 12-nji fewralynda Awstraliýanyň Pert şäherinde geçiriljek UFC 284 turnirinde Mahaçew Wolkanowskä garşy ilkinji titul goragyny geçirer.
