2026-njy ýylyň 13-nji iýunynda ABŞ-nyň Sent-Luis şäherinde geçiriljek RAF 10 ýaryşynyň çäginde UFC-niň guşagyna esasy dalaşgärleriň biri Arman Sarukýan bilen meşhur “weteran” söweşiji Toni Fergýusonyň arasynda erkin göreş boýunça tutluşyk bolar.
Sarukýan üçin bu tutluşyk soňky ýarym ýylyň içinde RAF ligasyndaky altynjy çykyşy bolar. UFC-niň ýeňil agramda ikinji orny eýeleýän söweşijisi häzirki wagtda MMA karýerasyny göreş ýaryşlary bilen utgaşdyryp, oktagondan daşarda hem ýokary işjeňlik görkezýär. Ol RAF-da yzly-yzyna dört gezek ýeňiş gazandy, şol sanda ýakynda Ýuraýa Feýberden hem üstün çykdy. Fergýuson bilen boljak tutluşykdan öň, ýagny 30-njy maýda Sarukýan RAF 09 ýaryşynda amerikaly bloger-pälwany Kilon «Mugzy» Jimison bilen hem güýç synanyşar.
Arman Sarukýan 2025-nji ýylyň noýabrynda geçiren soňky UFC söweşinde Den Hukerden ynamly ýeňiş gazandy. Şeýle hem, 29 ýaşly türgen Iliýa Topuriýa we Jastin Getjiniň arasyndaky çempionlyk söweşi (UFC Freedom 250) üçin resmi ätiýaçlyk söweşijisidigini mälim edipdi.
UFC-niň öňki wagtlaýyn çempiony, 42 ýaşly Toni Fergýuson üçin bolsa bu duşuşyk RAF ligasyndaky ilkinji çykyşy bolar. 2024-nji ýylyň awgustynda UFC-däki karýerasyny tamamlanyndan soň, Fergýuson özüni başga ugurlarda synap görýär. Ol 2025-nji ýylda boks älemine (Misfits Boxing ligasy) gadam basyp, yzly-yzyna iki ýeňiş gazanmagy başardy.
