Birleşen Arap Emirlikleri we Müsür dünýäde iri ýel elektrik stansiýalarynyň birini gurmak hakynda ylalaşdylar. Bu barada “WAM” agentligine salgylanyp, tengrinews.kz habar berýär.
Nygtalyşy ýaly, Birleşen Arap Emirlikleriniň Prezidenti Mohammed bin Zaýed Al Nahaýýan we Müsüriň Prezidenti Abdul-Fattah Halil Al Sisi dünýäniň iň iri ýel elektrik stansiýalarynyň birini gurmak hakynda Ylalaşyga gol çekdiler. Müsürde kuwwatlylygy 10 gigawat bolan ýel elektrik stnasiýasynyň taslamasyny işläp taýýarlamak hakynda BAE-niň gaýtadan dikeldilýän energiýa çeşmeleri boýunça “Masdar” kompaniýasynyň hem-de Müsüriň Hökümeti bilen ýurduň “Infinity Power и Hassan Allam Utilitie” işläp taýýarlaýjysynyň wekilleriniň arasynda Ähtnama gol çekilipdi.
Garaşylyşy ýaly, kuwwatlylygy 10 gigawatlyk ýel elektrik stansiýasynyň gurluşygynyň tamamlanmagy bilen, ol ýylda 47 müň 790 gigawat sagat arassa energiýany öndürer we 23,8 million tonna kömürturşy gazynyň zyňyndylarynyň öwezini dolar. Munuň özi Müsürde häzirki zyňylýan kömürturşy gazynyň 9 göterimine deňdir.
Şeýle-de täze ýel elektrik stansiýasy Müsüriň tebigy gaz üçin ýylda sarp edýän çykdajysynyň 5 milliard dollara golaýyny tygşytlar we täze iş orunlarynyň 100 müňüsini döretmäge mümkinçilik berer.
