Fransiýanyň futbol boýunça milli ýygyndysynyň öňki kapitany Zinedin Zidan Katarda geçiriljek dünýä çempionaty-2022-den soň ýurduň milli ýygyndysynyň baş tälimçisi bolar diýip, Libertad Digital habar berýär. Muny sport-interfax.ru ýetirýär.
Zidan Fransiýanyň Futbol federasiýasy bilen şertnama baglaşdy we ýygyndynyň baş tälimçisi wezipesinde Didýe Deşamyň ornuny çalşar. Bellenilişi ýaly, bu çözgüde Fransiýanyň milli ýygyndysynyň dünýä çempionatyndaky netijeleri täsirini ýetirmez.
Fransiýalylar häzirki dünýä çempionlarydyr, olar 2018-nji ýylda Russiýada geçirilen dünýä çempionatynda ýeňiji boldular.
Zidan oýunçy bolmak bilen, 1998-nji ýyldaky dünýä çempionatynda we 2000-nji ýyldaky Ýewropa çempionatynda ýeňiş gazandy. Tälimçi bolup, klub derejesinde Madridiň “Realyna” ýolbaşçylyk etdi. Zidanyň tälimçi bolan döwründe “Real” üç gezek Çempionlar ligasynda, iki gezek Ispaniýanyň çempionatynda, Superkubogynda, UEFA-nyň Superkubogynda, Klublaýyn dünýä çempionatynda ýeňiş gazandy.
Katarda dünýä çempionaty 20-nji noýabrdan 18-nji dekabr aralygynda geçiriler.
