Türkmenistanyň dolandyryş-çäk birlikleri babatda taýýarlanan teklipleriň amala aşyrylmagy bilen jemi 28 million manat býujet serişdeleriniň tygşytlanmagyna garaşylýar. Bu barada Türkmenistanyň Maliýe we ykdysadyýet ministri M.Serdarow 22-nji oktýabrda geçirilen mejlisde habar berdi.
TmCars.info-nyň habar berşi ýaly, 22-nji oktýabrda Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň ýolbaşçylygynda ýurdumyzyň döwlet dolandyryş ulgamyny has-da kämilleşdirmek, welaýatlaryň etraplarynyň, şäherleriniň we obalarynyň dolandyryş-çäk birliklerine gaýtadan seretmek meselelerine bagyşlanan mejlis geçirildi.
Mejlisiň barşynda bellenilişi ýaly, dolandyryş-çäk birlikleriniň kämilleşdirilmegi bilen baglylykda ulanyşdan boşadylýan, ykdysadyýetimiz üçin goşmaça mümkinçilikleri emele getirýän ýerli dolandyryş, bilim, medeniýet we maliýe-ykdysady edaralarynyň edara-binalaryny, desgalaryny netijeli peýdalanmak ýurdumyzyň ykdysady bähbitlerini has-da ýokarlandyrmaga mümkinçilik döreder we döwlet býujetiniň girdejilerini artdyrmaklyga oňyn täsirini ýetirer diýip, ministr belledi.
Halk Maslahatynyň Başlygy tygşytlanylan maliýe serişdeleriniň ýurdumyzyň durmuş ulgamyna, mekdepleriň we çagalar baglarynyň, saglyk edaralarynyň gurluşygyna, ösüp gelýän ýaş nesilleriň sazlaşykly ösüşiniň üpjün edilmegine gönükdirilmeginiň maksada laýyk boljakdygyny belledi.
