Boeing amerikan kompaniýasy maýadarlary Boeing 737 MAX uçarynyň howpsuzlygy bilen bagly ýalňyşdyrmak baradaky aýyplamalar sebäpli 200 mln dollar möçberinde jerime tölär, ýene 1 mln dollary kompaniýanyň öňki ýolbaşçysy Dennis Melenberg tölär. Bu barada ABŞ-nyň Gymmatly kagyzlar we biržalar boýunça komissiýasynyň (SEC) saýtynda ýerleşdirilen beýanda aýdylýar diýip, TASS habar berýär.
“SEC-iň Boeing we Melenberg bilen bagly buýruklarynda olaryň biperwaýlyk sebäpli gymmatly kagyzlar baradaky federal kanunyň kezzapçylyk bilen göreşmäge gönükdirilen düzgünini bozandyklary aýdylýar. SEC-iň netijelerini ykrar etmezden we ret etmezden Boeing bilen Melenberg, degişlilikde, 200 mln dollar we 1 mln dollar möçberinde jerimeleri göz öňünde tutýan buýruklar bilen ylalaşdy” – diýlip, beýanda aýdylýar. Zyýan çeken maýadarlaryň bähbidine ýörite gaznanyň dörediljekdigi hem bellenilýär.
Beýana görä, kompaniýa we onuň ýolbaşçysy Boeing 737 MAX 8-iň gatnaşmagynda bolan iki awiaheläkçiliginiň ilkinjisinden soň uçaryň “asmanda uçan islendik beýleki uçarlar ýaly howpsuzdygyna” ynandyrdylar.
2018-nji ýylyň 29-njy oktýabrynda Indoneziýada Lion Air awiakompaniýasynyň Boeing 737 MAX 8 uçary heläkçilige uçrap, 189 adam aradan çykdy. 2019-njy ýylyň 10-njy martynda Efiopiýada Ethiopian Airlines kompaniýasynyň şuňa meňzeş uçarynyň pidasy 157 adam boldy. Netijede, Boeing-iň ýolbaşçylygy iki ýagdaýda-da uçarlaryň bortynda heläkçilikden öň MCAS ulgamynyň işinde näsazlygyň bolandygyny boýun aldy.
2019-njy ýylyň dekabrynda Melenberg işinden çekildi. 2020-nji ýylyň 13-nji ýanwarynda onuň wezipesini Dewid Kelhun eýeledi.
