Ispan alymlary 24-27-nji iýul aralygynda Sewilýada temperaturanyň Selsiýa boýunça 44,4 derejä göterilmegine sebäp bolan yssy howa akymyna at dakdylar. Ol «Zoi» diýlip atlandyryldy diýip, Science Alert habar berýär.
Sewilýa uniwersitetiniň dosenti Hose Mariýa Martin Olalla bu - adatdan daşary temperaturalar we olaryň getirýän howpy barada jemgyýetçiligi habarly etmäge täze synanyşyk diýip belledi.
Gaý-tupanlara öz atlarynyň dakylýandygy bireýýämden bäri mälimdir. Soňky ýyllarda gyşky gomlara hem at goýmak ýoň boldy (ilkinji gezek şeýle ýagdaý 2012-nji ýylda ABŞ-da boldy). Ýöne adatdan daşary yssa at goýluşy ilkinji gezekdir.
Yssy akymy – bu häki-bir ýöne jöwzaly howa däl diýip, alymlar belleýärler. Bu adalga – üç günden az bolmadyk wagtyň dowamynda meteostansiýalaryň azyndan 10%-niň gije-gündiziň dowamyndaky kadanyň ep-esli ýokarlanandygyny bellige almagy diýip düşünilýär.
BSGG-niň hasaplamalaryna görä, 2000-2016-njy ýyllar aralygynda adatdan daşary yssynyň täsirine sezewar bolýanlaryň sany her ýyl 125 million adam köpelipdir. Ýokary temperatura adamy heläk edip bilýär, aýratynam ol ýitileşen keselleri bolan gartaşan adamlar üçin hasam howpludyr.
