“Forbes” amerikan žurnaly öz biznesini azyndan 630 mln dollara satmak mümkinçiligini öwrenýär. Biržada ýerleşdirmek üçin žurnal CitiGroup amerikan bankyny işe çekdi diýip, Reuters agentligi “Forbesiň” wekiline salgylanyp habar berýär. Muny TASS ýetirýär.
“Gyzyklanma bildiren taraplar köp boldy, şonuň üçin biz resmi satuw işine başladyk we CitiGroup bu işe ýolbaşçylyk etmek üçin işe çekildi” – diýip, agentlik žurnalyň wekiliniň sözlerini getirýär.
“The New York Times” tarapyndan getirilen şertnama baradaky resminama görä, “Forbes” 2021-nji ýylda 200 mln dollardan gowrak girdeji gazandy, düşewünt bolsa 40 mln dollardan gowrak boldy.
Maý aýynda žurnal maksatly birleşmek we satyn almak boýunça ýöriteleşdirilen kompaniýa SPAC (special purpose acquisition company) arkaly bazara çykmaga synanyşdy. Ýöne “Forbes” maýadarlaryň arasynda biržada ýerleşdirmegiň bu usulynyň özüne çekijiliginiň peselmegi sebäpli şertnamany ýatyrdy diýip, gazet ýazýar.
