Hytaýyň Ylymlar akademiýasy 2026-njy ýylda Weneranyň gurluşyny we atmosferasyny öwrenmek üçin VOICE (Weneranyň klimatyny we wulkanlaryny öwreniji) zondyny ibermegi meýilleşdirýär. Bu barada Milli kosmos ylymlarynyň merkeziniň saýtynda habar berilýär diýip, interfax.ru belleýär.
“VOICE-yň missiýasy aerokosmiki synag taslamasy tarapyndan goldanylan birnäçe missiýalaryň we meýilnamalaryň konsepsiýalaryny öwrenmäge esaslanýar. Ony 2026-njy ýylda uçurmak meýilleşdirilýär. 2027-nji ýylda ol ylmy derňewleri geçirmek üçin Weneranyň orbitasyna çykar” – diýlip, habarda aýdylýar.
Agramy, takmynan, 350 kg bolan awtomatik planetara stansiýasy VOICE, alymlaryň meýilnamasy boýunça, Weneranyň geologiki ewolýusiýasyny, onuň atmosferasyndaky termal we himiki prosesleri hem-de planetanyň üstündäki bulutlarda ýaşaýşyň bolup bilmek mümkinçiligini öwrener.
Missiýanyň dowamynda döwrebap ýokary tehnologiki enjamlar, şol sanda suratlary ýokary durulykda almak üçin multispektral şekilleri emele getirijiler we aperturanyň radiolokasion sintezi üçin radiolokatorlar ulanylar. Bu tehnologiýa enjamyň beýikligine, howa şertlerine we surata düşürilýän obýektiň yşyklandyrylyşyna garamazdan, ýokary durulykda Ýeriň uzak aralykdan zond bilen barlagyny geçirmäge mümkinçilik berýär.
