Türkmenistanyň «EKSPO — 2025» Bütindünýä sergisine gatnaşmagynyň ýokary guramaçylyk derejesini üpjün etmek boýunça degişli işler alnyp barylýar. Bu barada Ministrler Kabinetiniň 24-nji iýunda geçirilen sanly ulgam arkaly mejlisinde wise-premýer B.Atdaýew hasabat berdi.
Hususan-da, “Ýaşaýşymyz üçin geljegiň jemgyýetini döredýäris” şygary astynda guraljak bu halkara forumyň 2025-nji ýylyň 13-nji apreli — 13-nji oktýabry aralygynda Ýaponiýanyň Osaka şäherinde geçiriljekdigi habar berildi. Guramaçylyk işleriniň dowamynda ýapon tarapy Türkmenistanyň milli pawilýonyny “Durmuş mümkinçiliklerini giňeltmek” atly bölümde ýerleşdirmegi teklip edýär. Şunuň bilen baglylykda, «EKSPO — 2025» sergisinde milli pawilýonymyzy gurmagyň taslamalaryny saýlap almak üçin ýurdumyzyň gurluşyk kompaniýalarynyň arasynda bäsleşik yglan etmek meýilleşdirilýär.
Döwlet Baştutany «EKSPO — 2025» sergisine gatnaşmagyň möhümdigi barada aýdyp, şeýle giň gerimli gözden geçirişleriň Watanymyzyň gazananlaryny, onuň eksport kuwwatyny açyp görkezmek, tejribe alyşmak, özara bähbitli hyzmatdaşlyk meselelerini oňyn çözmek üçin täze mümkinçilikleri açýandygyny nygtady.
