Halkara Futbol Federasiýasy (FIFA) 2022-nji ýylda Katarda geçiriljek dünýä çempionatynyň oýunlarynyň senenamasyny neşir etdi. Bu barada guramanyň metbugat gullugy habar berýär diýip, TASS belleýär.
21-nji noýabrda açylyş oýnunda A toparçada çykyş edýän Senegalyň we Niderlandlaryň toparlary duşuşar, oýun Aşgabat wagty bilen 15:00-da başlar. Duşuşyk Doha şäherindäki “Al-Tumama” stadionynda geçiriler. Ilkibaşda açylyş oýnunda A toparçada çykyş edýän Kataryň we Ekwadoryň toparlary oýnamalydy, ýöne olaryň duşuşygy sagat 21:00-a süýşürildi.
Hojaýyn ýurduň milli ýygyndysy 2002-nji ýyldan bäri ilkinji gezek dünýä çempionatynyň ilkinji oýnunda oýnamaz, şol wagt ýaryş Ýaponiýada we Günorta Koreýada geçirildi, açylyş oýnunda Fransiýa bilen Senegalyň toparlary (0:1) oýnady. Adatça, ýaryşyň ilkinji oýny ýaryşy kabul edýän ýurduň toparynyň gatnaşmagynda geçirilýär.
Dünýä çempionatynyň ilkinji gününde B toparçada çykyş edýän ýygyndylaryň hem oýny bolar. Angliýalylar Dohadaky “Halifa” halkara stadionynda Eýranyň toparyna garşy oýnar (sagat 18:00-da başlar). ABŞ-nyň milli ýygyndysy Şotlandiýanyň, Uelsiň we Ukrainanyň toparlarynyň arasynda pleý-off tapgyrynyň ýeňijisi bilen duşuşar, oýun Er-Raýýan şäherindäki “Ahmad bin Ali” stadionynda geçiriler we 0:00-da başlar.
Final oýny 18-nji dekabrda “Lusail” stadionynda bolup, 20:00-da başlar. Üçünji orun üçin oýun bir gün öň Al-Raýan şäherindäki “Halifa” halkara stadionynda geçiriler. Oýun 20:00-da başlar.
