«Barselona» futbol kluby 2025/26 möwsüm üçin üçünji egin-eşik toplumyny görkezdi. Hansi Fligiň topary 2014/15 möwsüminden bäri ilkinji gezek mämişi köýnekçede meýdana çykar. Klub taryhynda bu reňk sekizinji gezek ulanylar.
Ilkinji gezek mämişi forma 1991/92 möwsüminde peýda bolupdy. Şol döwürde «Barselona» ilkinji gezek Ýewropa çempionlarynyň Kubogyny gazandy (bu ýaryş şol ýyl soňky gezek şeýle at bilen geçirildi, soňraky möwsümden «Çempionlar ligasy» adyny aldy). Finalda katalonlylar Ronald Kumanyň goly bilen «Sampdoriýany» ýeňdi.
Soňra bu reňke klub 1997/98 we 1998/99 möwsümlerinde dolandy. Şol ýyllarda Lui wan Galyň ýolbaşçylygynda topar yzly-yzyna iki gezek Ispaniýanyň çempiony boldy.
2006/07 möwsüminde Frank Raýkardyň döwründe «Barselona» doly mämişi lybasy bilen oýnady we Ispaniýanyň Superkubogyny gazandy. Şol döwürde bu formada Puýol, Hawi, Inýesta, Messi we Ronaldinýo oýnady.
2009-njy ýylda Hosep Gwardiolanyň topary mämişä ýakyn reňkdäki formany geýipdi. Şonda katalonlar taryhy «seksteti» gazanyp, bir ýylyň içinde mümkin bolan kuboklaryň ählisini, şol sanda Klublaýyn dünýä çempionatyny hem gazandylar.
2012/13 möwsüminde klub sary-mämişi eşikde çykyş etdi we çempionatda rekord derejede 100 utuk toplady. Iň soňky doly mämişi toplum bolsa 2014/15 möwsüminde Luis Enrikeniň ýolbaşçylygynda ulanyldy. Şonda topar öz taryhynda ikinji gezek «trebl» gazandy.
