Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow 1-nji aprelden zähmet rugsadyna çykar. Degişli haýyş bilen Gurbanguly Berdimuhamedow Ministrler Kabinetiniň sanly ulgam arkaly mejlisiniň barşynda Türkmenistanyň Prezidenti Serdar Berdimuhamedowa ýüz tutdy. Bu barada «Watan» habarlar gepleşiginde habar berildi.
Gurbanguly Berdimuhamedow köp ýyl bäri ýolbaşçy wezipede işleýändigini, 25 ýyl syýasat bilen meşgul bolandygyny, şu döwürde işiň köp bolmagy bilen bagly dynç almaga doly derejede wagtynyň bolmandygyny aýtdy. Şunuň bilen baglylykda, Gurbanguly Berdimuhamedow 1-nji aprelden zähmet rugsadynyň berilmegini sorap ýüz tutdy.
Bu döwürde Türkmenistanyň Milli Geňeşiniň Halk Maslahatynyň Başlygy täze kitaplaryny tamamlap, Merkezi Aziýa ýurtlarynyň hem Russiýa Federasiýasynyň Parlamentara Forumyny, Merkezi Aziýa ýurtlarynyň we Russiýanyň zenanlar dialogyny hem-de beýleki halkara çärelerini ýokary derejede geçirmäge taýýarlyk görjekdigini belledi.
Dynç alyş döwründe Türkmenistanyň Milli Geňeşiniň Halk Maslahatynyň Başlygynyň wezipe borçlaryny Halk Maslahatynyň Başlygynyň orunbasary Kasymguly Babaýew ýerine ýetirer.
