Hytaýly žurnalistler bilen söhbetdeşlikde Prezident Gurbanguly Berdimuhamedow şu ýyl diplomatik gatnaşyklaryň 30 ýyllygy bellenilýän türkmen-hytaý hyzmatdaşlygynyň haýsy ugurlarda has netijeli ösdürilýändigi bilen bagly sowala, ine, şeýle jogap berdi.
— Biz Türkmenistanyň Garaşsyz döwlet hökmünde berkarar bolmagynyň barşynda Hytaýyň beren goldawyna, Bitaraplyk derejämize hem-de onuň binýadynda alyp barýan daşary syýasat strategiýamyza hormat bilen garandygyna ýokary baha berýäris we muny hiç wagt ýatdan çykarmarys — diýip, türkmen Lideri Türkmenistanyň «bitewi Hytaý» syýasatyny, kenarýaka gatnaşyklarynyň parahatçylykly ýol bilen ösdürilmegini we Hytaýyň parahatçylykly birleşdirilmegini hemişe berk goldaýandygyny mälim etdi.
«Türkmenistan üçin Hytaý diňe bir beýik döwlet, dünýäniň örän kuwwatly ykdysady we senagat merkezi, giň we geljegi uly bazar däl-de, wagtyň synagyndan geçen ygtybarly dostdur» diýip, döwlet Baştutany türkmen-hytaý gepleşikleriniň gün tertibinde Merkezi Aziýadaky ýagdaýy ara alyp maslahatlaşmak meselesiniň aýratyn orun eýeleýändigini aýtdy.
Ýangyç-energetika ulgamy hem Türkmenistanyň we Hytaý Halk Respublikasynyň hyzmatdaşlygynyň ileri tutulýan ugurlarynyň biri hökmünde görkezildi. 2009-njy ýylyň ahyrynda strategik ähmiýetli Türkmenistan — Hytaý gaz geçirijisiniň ulanylmaga berilmegi hem munuň subutnamasydyr. Şunuň bilen baglylykda, türkmen Lideri ýurdumyzyň Hytaýa çenli ugur boýunça 4-nji turbageçirijini gurmagyň mümkinçiliklerini düýpli ara alyp maslahatlaşmaga taýýardygyny hem mälim etdi.