18-nji ýanwarda Moskwada GDA-nyň Ýerine ýetiriji komitetiniň başlygy — Ýerine ýetiriji sekretary Sergeý Lebedew bilen Türkmenistanyň Russiýa Federasiýasyndaky Adatdan daşary we Doly ygtyýarly ilçisi Batyr Niýazliýewiň arasynda duşuşyk geçirildi. Taraplar Türkmenistanyň GDA bilen özara gatnaşyklaryny mundan beýläk-de ösdürmegiň geljegi uly ugurlary barada pikir alyşdylar.
Duşuşygyň dowamynda ilçi Batyr Niýazliýew Sergeý Lebedewe Türkmenistanyň Prezidenti Gurbanguly Berdimuhamedowyň adyndan «Türkmenistanyň Bitaraplygynyň 25 ýyllygyna» atly ýubileý medalyny gowşurdy.
Ýeri gelende bellesek, «Türkmenistanyň Bitaraplygynyň 25 ýyllygyna» ýubileý medaly ýurdumyzyň hemişelik Bitaraplyk derejesine eýe bolmagynyň 25 ýyllygy mynasybetli döredildi. 2020-nji ýylyň dekabrynda Prezident Gurbanguly Berdimuhamedow daşary ýurtlaryň raýatlarynyň bir toparyny bu ýubileý medaly bilen sylaglamak hakynda Permana gol çekdi.
