Avast kompaniýasy 2021-nji ýylyň üçünji çärýegi boýunça howply wiruslaryň hasabatyny çap etdi. Bu barada kompaniýa salgylanyp, msn.com habar berdi.
Kompaniýanyň laboratoriýasynyň barlagçylarynyň pikiriçe, soňky döwürde zyýanly programma üpjünçiliginiň we uzakdan aralaşyp bilýän troýanlaryň hüjümlerine duçar bolmak howpy ep-esli artdy. Olar içalyçylyk, şahsy maglumatlary ogurlamak, yzarlamak we hatda DDoS-hüjümleri üçin ulanylyp bilner.
9-njy sentýabrda “Avast”-yň hünärmenleri täze hüjüm synanyşygyny ýüze çykardylar hem-de ony böwetlediler. Üçünji çärýekde “Avast” laboratoriýasynyň topary 2021-nji ýylyň birinji çärýegine garanyňda, zyýanly programma üpjünçiliginiň hüjümleriniň töwekgelçilik derejesiniň 20%-den gowrak ýokarlanandygyny aýtdylar.
“Avast”-yň hünärmenleri adaty ulanyjylara howp salýan uzakdan aralaşyp bilýän troýanlaryň üç sany täze wersiýasyny tapdylar. Olar - wirtual maşynlardan goragly FatalRAT, Internet Explorer-iň gowşaklygyndan peýdalanýan VBA RAT, şeýle hem web kamerasyna giriş we faýl ogrulygyny goşulan Reverse RAT 2.0.
