Beýik Britaniýanyň şu aprelde 95 ýaşyny dolduran şa zenany Ýelizaweta II özüni ýaş duýýandygy sebäpli "Ýylyň garryja zenany" diýen hormatly baýrakdan ýüz öwürdi. Bu barada 29 ýyl bäri gowşurylýan baýragyň ýolbaşçysy Jaýls Brandrese salgylanyp, TASS ýazdy.
Jaýls Brandres baýragy guraýjylaryň koronawirus pandemiýasy wagtynda monarhyň bitiren hyzmatlaryny belläp geçmek teklibi bilen Bukingem köşgüne barandyklaryny hem-de sypaýy, ýöne kesgitli ret jogabyny alandyklaryny aýtdy.
Guramaçylaryň belleýşi ýaly, "Ýylyň garryja zenany" (ýa-da erkek adama gowşurylanda "Ýylyň garryja adamy") baýragy ençeme ýyl bäri monarhyň ejesi Ýelizaweta Buoz-Laýon (1900-2002), suratkeş Deýwid Hokni ýaly şahsyýetlere, şeýle hem Oskar we Nobel baýraklarynyň eýelerine gowşurylyp gelinýärdi.
