Britaniýanyň gizlin gullugynyň agenti Jeýms Bonduň keşbini ýerine ýetiren aktýor Deniel Kreýg kinoepopeýasynyň surata düşürilişiniň soňky gününde hoşlaşyk sözüni aýtdy. Bu barada “The Daily Mail” habar berýär diýip, gazeta.ru belleýär.
Aktýor 15 ýylyň dowamynda aňtawçynyň keşbini ýerine ýetirdi, ol ilkinji gezek “Kazino roýal” (2006) filminde peýda boldy. Kreýgiň gatnaşmagynda “agent 007” hakynda jemi bäş film surata düşürildi, olardan iň soňkusy – “Ölmegiň wagty däl” şu ýylyň oktýabr aýynda çykarylar.
Iň soňky surata düşürilişde Kreýg Jeýms Bond hakynda filmiň döredilmegine gatnaşanlaryň ählisine minnetdarlyk bildirdi.
“Men munuň bilen köp wagt bäri meşgullanýaryn we siziň käbirleriňiz bilen karýeramyň köp böleginde bile işleşdim. Bu 30 ýyl töweregi. Siziň köpüňiz bolsa meniň bilen bäş filmde-de zähmet çekdiňiz” – diýip, aktýor minnetdarlygyny bildirdi.
Kreýg “bu filmleriň her bir sekuntyndan, hususan-da iň soňky filmden lezzet alandygyny” aýtdy. Ol birnäçe ýyl ýerine ýetiren keşbi bilen hoşlaşmagyň örän kyndygyny hem boýun aldy.
“Meniň bu wezipedäki hyzmatym eýýäm tamamlandy, ýöne bu has uly bir zadyň bölegidir. Men yzyma garaýaryn we... Men çyn ýürekden şeýle hasaplaýaryn. Bu filmleri ýadyma düşürip, olara buýsanýaryn. Biz olaryň üstünde örän köp zähmet çekdik” – diýip, Deniel Kreýg belledi.
