Eýranyň Ýokary lideri aýatolla Ali Hamenei 3-nji awgustda sişenbe güni prezident saýlawlarynda ýeňiş gazanan Ibrahim Raisä prezident mandatyny gowşuryp, ony Eýranyň prezidenti diýip tassyklady. Bu barada “Tehran Times” gazeti habar berýär diýip, interfax.az belläp geçýär.
“Men tejribeli, tutanýerli, başarjaň, meşhur alym Hujat al-Islam wal-Muslimin Saýid Ibrahim Raisiniň ýeňşini goldaýaryn we ony Eýran Yslam Respublikasynyň prezidenti edip belleýärin” – diýlip, Ýokary lideriň saýtynda ýerleşdirilen Hameneiniň beýanynda aýdylýar.
Neşiriň maglumatlaryna görä, Raisini tassyklamak dabarasy saglygy goraýyş pudagyndaky teswirnamalara laýyklykda geçirildi. Şol bir wagtyň özünde sebitleýin KHBS tassyklama dabarasynyň – “tanfiziň” (parsça “tassyklama”) prezidentiň kasam kabul ediş dabarasy däldigini bellediler.
Raisiniň Eýranyň Parlamentinde – Mejlisinde kasam kabul ediş dabarasy 5-nji awgustda ýerli wagt boýunça 17:00-da geçiriler.
Eýranyň Mejlisiniň prezidiumynyň wekili Nezam ad-Din Musawiniň aýtmagyna görä, kasam kabul ediş dabarasyna 73 döwletden 115 wekil gatnaşar. Ol dabara 10 prezidentiň, 20 parlament spikeriniň, 11 DIM-niň, 10 beýleki ministriň, prezidentiň wekilleriniň, şeýle-de parlament wekiliýetleriniň geljekdigini aýdyňlaşdyrdy.
Eýranda prezident saýlawlary 18-nji iýunda geçirildi. Onda Ibrahim Raisi ýeňiş gazandy.
