WhoScored statistika portaly Londonda final oýny bilen tamamlanan Ýewropa çempionatynyň simwoliki ýygyndysyny düzdi diýip, bobsoccer.ru belleýär. Final oýnunda Italiýanyň hem-de Angliýanyň ýygyndy toparlary ýeňijini esasy we goşmaça wagtda-da kesgitläp bilmediler. Netijede, penalti seriýasynda italýanlar üstün çykdy.
Italiýanyň milli ýygyndysynyň derwezebany Janluiji Donnarumma, garaşylyşy ýaly, Ýewro-2020 toparyna girdi. Ol turniriň iň gowy oýunçysy hem bolupdy. WhoScored ÝÇ-2020-niň jemi boýunça Donnarumma 7.0 bahany berdi. Simwoliki topardaky oýunçylaryň arasynda iň ýokary bahany Kriştianu Ronaldu (Portugaliýa) aldy – 7.9. Portugaliýa Belgiýadan utulyp (0-1), 1/8 final tapgyrynda ýaryşdan gitdi. Ronaldu bäş gol geçirdi.
Italiýanyň milli ýygyndysyndan Donnarumadan başga-da, simwoliki topara Marko Werratti we Leonardo Bonuççi girdi. Angliýadan bolsa Garri Maguaýr we Lýuk Şou bar.
Sanalyp geçilen oýunçylardan başga, simwoliki topara şular hem goşuldy: Wladimir Soufal (Çehiýa), Toma Menýe (Belgiýa), Pol Pogba (Fransiýa), Emil Forsberg (Şwesiýa), Patrik Şik (Çehiýa).
