ABŞ-nyň Demirgazyk Kaliforniýa ştatynyň Oklend şäherindäki haýwanat bagynda haýwanlara koronawirusa garşy sanjym edip başladylar. Bu barada guramanyň internet saýtynda habar berilýär. Ony lenta.ru paýlaşdy.
Ilkinji sanjymlar kesel ýokaşmak howpy ýokary bolan jandarlara, ýagny gaplaňlara, gara we çal aýylara, dag ýolbarslaryna, horýoklara ediler. Olar eýýäm iki gezeklik sanjymyň birinji dozasyny kabul etdiler. Soňra weterinarlar maýmynlara, ýarganatlara we doňuzlara sanjym etmäge girişerler.
«Biz häzire çenli COVID-19-a has duýgur jandarlarymyzyň howpsuzlygy üçin howpsuz aralygy saklamak bilen, işgärlerimiziň geýen ýokary hilli şahsy gorag serişdeleri bilen birlikde, jemgyýetçilik päsgelçiliklerini ulandyk. Bu sanjymyň kömegi bilen indi öz haýwanlarymyzy has oňat gorap biljekdigimiz üçin biz begenýäris» diýip, Oklend haýwanat bagynyň weterinar gullugynyň wise-prezidenti, doktor Aleks German aýdýar.
Sanjymlar Zoetis kompaniýasy tarapyndan öndürilip, ABŞ-nyň haýwanat baglarynyň onlarçasyna haýyr-sahawat hökmünde berildi. Barlagçylar topary pişikler, itlerdir öý guşlary we iri şahly mallar üçin koronawirusa garşy beýleki sanjymlary işläp taýýarlamak üçin köpýyllyk tejribeden peýdalandylar. Bu sanjymlar ýörite haýwanlar üçin işlenip taýýarlanyldy.
