«Awtostat» agentligi awtoulaglaryň reňklerinde zenanlar bilen erkekleriň haýsy reňke isleg bildirýändigine bagyşlanan pikir soraşmalaryň netijesini mälim etdi. Oňa respondentleriň 7,5 müňden gowragy gatnaşdy. Bu barada auto.mail.ru habar berýär.
Müşderiler täze awtoulaglary satyn alanlarynda, zenan ýa-da erkekdigine garamazdan, esasan, ak, gara we kümüşsow reňkleri saýlaýarlar. Sorag edilýän erkekleriň 26,6 göterimi hem-de zenanlaryň 24,3 göterimi ak reňke ses berdiler. Gara reňki zenanlaryň 16,6 göterimi, erkekleriň bolsa 21 göterimi saýlady. 15,9 göterim zenanlar we 12,7 göterim erkekler kümüşsow reňke isleg bildirdiler. Munuň özi zenanlarda bu reňke islegiň ýokarydygyny görkezýär.
Çal we gök reňkler hem ilkinji bäşlige girdi. Bu reňkleriň ikisi-de zenanlarda deň ses gazandy — 10,7 göterim. Şeýle hem zenanlaryň we erkekleriň goňur we ýaşyl reňklere gatnaşygynyň birmeňzeşdigi ýüze çykaryldy.
Gyzyl reňki saýlamakda bolsa aratapawut has ýokary: bu reňki zenanlaryň 10,6 göterimi, erkekleriň bolsa bary-ýogy 3,6 göterimi saýlady.
