Kanadanyň milli ýygyndysy hokkeý boýunça dünýä çempionatynda ýaryşyň finalynda Finlýandiýadan 3:2 hasabynda üstün çykyp, ýeňiji boldy.
Hasap oýnuň birinji döwrüniň dokuzynjy minudynda açyldy, şaýbanyň awtory Mikael Ruohomaa boldy.
Ikinji döwrüň bäşinji minudynda kanadalylar hasaby deňlediler. Döwrüň tamamlanmagyna dört minut galanda Kanadanyň milli ýygyndysynyň kapitany Adam Henrik şaýbany Finlýandiýa toparynyň derwezesine girizdi, emma gol hasap edilmedi.
Üçünji döwrüň altynjy minudynda Petteri Lindbom oýunda hasaby 2:1 edip, Finlýandiýany öňe çykardy. Ýöne bäş minutdan soň Kanadanyň hokkeýçileri ýene-de hasaby deňlediler, Adam Henrik şaýbany tora girizdi. Duşuşygyň esasy wagty deňme-deňlikde tamamlandy we oýun owertaýma geçdi, bu ýerde kanadalylar üstün çykdylar, hasap 3:2. Ýeňiş şaýbasynyň awtory Nik Pol boldy.
Ýekşenbe güni dünýä çempionatynyň üçünji orny üçin oýun geçirildi, onda ABŞ-nyň milli ýygyndysy Germaniýany 6:1 hasabynda ýeňdi.
