Çarşenbe güni, 26-njy maýda Aý bilen baglanyşykly üç astronomiki hadysanyň bolmagyna garaşylýar: perigeý (orbitanyň bu nokadynda Aý bilen Ýeriň arasyndaky aralyk has gysgalýar), doly Aý we Aýyň doly tutulmagy (planetamyzyň tebigy hemrasy Ýeriň kölegesiniň konusyna girende). Bu barada tvzvezda.ru belläp geçýär.
Moskwa planetariýasynyň maglumatlaryna görä, doly Aýyň başlan pursaty Aýyň 9 sagat 22 minutda perigeý nokadyny geçmegi bilen gabat geler. Bu 26-njy maýda Ýeriň käbir sebitleriniň ýaşaýjylarynyň Super Aýy – 2021-nji ýylyň iň uly Aýyny we onuň doly tutulmasyny görüp biljekdigini aňladýar.
Koreýanyň Kýonhi uniwersitetiniň professory Ýewgeniý Zubko Aý tutulmasynyň aşgabat wagty boýunça 14:50-de başlajakdygyny aýtdy. Bir ýarym sagatdan soň ol, takmynan, 20 minut dowam etjek doly faza geçer.
Aýyň doly we bölekleýin fazalary Demirgazyk Amerikanyň günbatar kenarynda, Ýuwaş ummanynda, Indoneziýada, Awstraliýada, Aziýanyň gündogar kenarynda görner. Planetariýada Aýyň Ýeriň kölegesine doly giren wagty, tebigy hemramyzyň gyzyl, goýy gyzyl ýa-da goňur reňke eýe boljakdygy bellenildi.
