Russiýa täze görnüşli koronawirus pandemiýasyna garşy göreşde Türkmenistan bilen hyzmatdaşlyga oňyn baha berýär diýip, Russiýanyň Türkmenistandaky ilçisi Aleksandr Blohin 2020-nji ýylyň jemi boýunça geçirilen metbugat maslahatynda aýtdy. Bu barada ORIENT habar berýär.
Onuň belleýşi ýaly, Moskwa Türkmenistana 50 müňden gowrak barlag üçin barlag-ulgamlaryny mugt berdi, rus we türkmen lukmanlary bolsa onlaýn görnüşde lukmançylyk pudagynda hyzmatdaşlygy ösdürmegiň meselelerini işjeň maslahatlaşýarlar.
Russiýanyň ilçisi Türkmenistanyň Russiýadan 8 million dollardan gowrak derman serişdelerini we lukmançylyk esbaplaryny satyn alandygyny we Russiýanyň bu ugurda Aşgabat bilen hyzmatdaşlyga oňyn garaýandygyny aýtdy.
“Russiýa tarapy Türkmenistana möwsümleýin dümew sanjymyny iberdi. Biz sanjymymyza, hususan-da, “Sputnik V” sanjymyna türkmenler tarapyndan isleg bildiriljekdigine we bu sanjymyň zerur mukdary kärhanalarymyzda öndürilen badyna Russiýa tarapyndan üpjün ediljekdigine umyt bildirýäris” – diýip, Russiýanyň doly ygtyýarly wekili belledi.
