Birleşen Milletler Guramasynyň Çagalar gaznasy (ÝUNISEF) 2021-nji ýylda 2 milliarda golaý dozada koronawirus sanjymyny satyn alar we mätäç ýurtlara iberer. Bu barada guramanyň habaryna salgylanyp, Sputnik gullugy habar berýär.
ÝUNISEF "COVID-19 sanjymlaryny elýeterli bolan badyna 92-den gowrak ýurda gowşurmagy meýilleşdirýär" diýlip, guramanyň habarynda aýdylýar. Gazna eýýäm geljekki ibermeleriň logistikasyny işläp başlady. Gurama howa arkaly daşaýjy, gämi gatnawy we beýleki ulag kompaniýalary - jemi 350-den gowrak hyzmatdaş bilen işleşýär.
ÝUNISEF Pan Amerikan Saglygy goraýyş Guramasy (PAHO) we Halkara Howa Ulaglary Assosiasiýasy bilen bilelikde COVID-19 sanjymlarynyň uly tapgyryny satyn almak we daşamak meýilleri barada iri awiakompaniýalara mälim etdiler.
Koronawirusa garşy derman serişdeleri COVAX merkezi bilen şertnama baglaşan kompaniýalardan satyn alnar.
Ozal gazna mätäç ýurtlara şahsy gorag enjamlary, kislorod konsentratorlary we synag enjamlary bilen üpjün edipdi. ÝUNISEF-iň ýanwar aýynyň başyndan bäri berýän kömegi 190 million dollar diýlip bahalandyrylýar.
COVAX - munuň özi BSGG-niň global sanjym öndürijileri bilen aragatnaşyk başlangyjydyr. Onuň maksady dünýäniň ähli ýurtlaryna koronawirusyň öňüni alýan howpsuz we täsirli dermanlara deň mümkinçilik bermekden ybaratdyr. Häzirki wagtda dünýäniň 172 ýurdy COVAX tarapyndan hasaba alyndy.
