Ýakynda Twittere edilen "hüjüm" "Discord" habarlaşmasynda biri-biri bilen aragatnaşyk saklaýan amerikaly we iňlis ýaşlary tarapyndan, sosial ulgamyň özünde işleýändigini we ulanyjy hasaplaryna ygtyýarynyň bardygyny öňe sürýän "Kirk" lakamly biriniň ýolbaşçylygynda amala aşyryldy. Bu barada muňa dahylly hakerlere we olar tarapyndan neşire ýetirilen habarlaşmanyň beren ekran suratlaryna esaslanyp, "New York Times" habar berýär. Muny ria.ru ýetirýär.
Habar berlişine görä, "New York Times" bu işe gatnaşan dört haker bilen habarlaşmagy başarypdyr: olaryň arasynda "lol" we "ever so anxious" lakamly ulanyjylar bar. Neşire hakerler bilen habarlaşmaga kaliforniýaly howpsuzlyk hünärmeni Hasib Awan ýardam etdi. Awan hakerler bilen aragatnaşyk saklaýandygyny, sebäbi olaryň ozal eýeçiligindäki kompaniýasyny "döwmäge" synanyşandyklaryny aýtdy.
"lol" şahsyýetini aýan etmese-de, neşire özüniň ABŞ-da ýaşaýandygyny we takmynan 20 ýaşyndadygyny, onuň "ever so anxious" lakamly dosty bolsa 19 ýaşyndadygyny, ejesi bilen Angliýada ýaşaýandygyny aýtdy.
Gazet "Kirk" lakamynyň arkasynda kimiň durandygyny we sebäplerini anyklap bolmandygyny ýazýar. Ogurlyk işiniň derňewini alyp barýan sülçüleriň aýtmagyna görä, hakerleriň neşir bilen paýlaşan käbir jikme-jiklikleri derňewiň netijesinde şu wagta çenli kesgitlenen zatlara bilen gabat gelýär diýip, gazetde nygtalýar.
Ýadymyzda bolsa, näbelli adamlar amerikaly meşhurlar adamlaryň birnäçesiniň hasaplaryny, ýagny akkauntlaryny "döwüpdiler". Pidalaryň arasynda ABŞ-nyň öňki wise-prezidenti Jo Baýden, öňki prezident Barak Obama, "Tesla" we “SpaceX”-iň esaslandyryjysy Ilon Mask, milliarderler Bill Geýts, Maýkl Blumberg we Uorren Baffet, "Amazonyň" baş direktory Jeff Bezos, rap aýdymçysy Kanýe Uest, kompaniýalardan "Apple" , "Uber" we beýlekiler bar. "Döwlen" akkauntlardaky ýazgylaryň awtorlary özlerine iberilen bitcoinleri 30 minutyň içinde iki esse edip yzyna bermegi wada beripdiler.
