Atlantika ummanynda emele gelen “Feý” tropiki tupany Nýu-Jersi amerikan ştatyna ýetdi. Bu barada ntv.ru habar berýär. Ýeliň tizligi sagatda 85 kilometrden geçýär. Häzir tupan Atlantik-Sitiden, takmynan, 15 kilometrlikde we günorta Nýu-Ýorkdan 145 kilometrlikde ýerleşýär, ol Nýu-Ýorka tarap sekuntda 6 metr tizlik bilen ýakynlaşýar.
“Feý” adyny alan tropiki tupanyň ýakynlaşýandygy barada Harasatlara gözegçilik boýunça ABŞ-nyň milli merkezinde duýduryldy.
“Delawer ştatynyň demirgazygynda, Pensilwaniýa ştatynyň gündogarynda, Nýu-Ýork ştatynyň günorta-gündogarynda we Täze Angliýada suw basyp almanyň we güýçli çabganyň bolmagyna garaşylýar” – diýip, çeşmä salgylanmak bilen TASS ýazýar.
Deňizde tupan turýar. Kenarýaka zolaklardaky köçeleriň onlarçasyny suw basdy. Ýaşaýyş jaýlaryny hem suw basyp alan. Nýu-Jersi amerikan ştatynyň ýaşaýjylary suw basyp alan köçeleri, öýleri we awtomobilleri wideo düşürdiler. Tropiki tupanyň ýakynlaşýandygy sebäpli, ABŞ-nyň prezidenti hatda Porsmutda (Nýu-Gempşir ştaty) saýlawdan öňki duşuşygyň geçirilmegini 2 hepde soňa goýdy. Donald Tramp hökümetiň we gulluklaryň tupanyň ýüze çykmagyna taýýardygyny belledi.
