Gurbanguly Berdimuhamedow Ýaponiýanyň ýolbaşçylaryna gynanç bildirdi

Türkmenistanyň Prezidenti Gurbanguly Berdimuhamedow Ýaponiýanyň Imperatory Naruhito hem-de Ýaponiýanyň Premýer-ministri Sindzo Abä Ýaponiýanyň günorta sebitinde bolup geçen giň gerimli suw joşguny we süýşgünler netijesinde köp sanly adam pidalary, şikes ýetmeleri hem-de uly möçberli weýrançylyklar zerarly gynanç hatlaryny iberdi.
Döwlet Baştutany halkyň, Hökümetiň, şeýle hem öz adyndan şu agyr pursatda gurban bolanlaryň dogan-garyndaşlaryna we ýakynlaryna ýürekden gynanjyny hem-de medet beriji sözlerini, ejir çekenlere bolsa, tiz wagtda sagalmaklary baradaky dileglerini beýan etdi.
Belläp geçsek, Ýaponiýanyň güýçli çabga ýagýan günorta-günbatar we merkezi etraplaryndan 870 müňden gowrak adam çarşenbe güni gyssagly göçürilmek barada görkezme aldy. Bu barada çarşenbe güni Kyodo agentligi habar berýär.
TASS agentliginiň habar berşi ýaly, bu görkezme alty sany prefekturanyň — Fukuokanyň, Kumamotonyň, Oitanyň, Gifunyň, Naganonyň we Hýogonyň etraplaryna degişli.
Güýçli çabgalaryň netijesinde Kýusýu adasynyň günorta-günbatarynda soňky üç günde 60 töweregi adam aradan çykdy, 13 adam dereksiz ýiten hasaplanylýar. Häzir ýagyn ugry Kýusýudan esasy ýapon adasy Honsýunyň merkezine süýşýär. Kýusýuda Ýaponiýanyň Toyota Motor awtomobil konserniniň üç sany iri zawody hem öz işini dikeltdi.
Mundan öň, Ýaponiýada 1,3 million adamy ewakuasiýa etmek hakynda görkezme berlipdi.