Volkswagen Türkiýede kärhana gurmakdan boýun gaçyrdy

Volkswagen nemes kompaniýasy meýilnamalaryny gözden geçirmek kararyna geldi we Türkiýede täze önümçilik meýdançasyny gurmakdan saklandy. Öndürijiniň metbugat beýanatynda habar berlişine görä, konserniň ýolbaşçylygy tarapyndan şeýle netijä gelinmegiň sebäbi täze modelleri satyn almaga bolan islegiň birden pese gaçmasy boldy, muny glas.ru habar berýär.
Täze görnüşli koronawirus infeksiýasy ykdysady çökgünlige uly täsirini ýetirdi. Geljekde kärhanada Passat we Skoda Superb modelleriniň täze nesillerini öndürmek meýilleşdirilipdi, indi bu modelleri çykarmak işi bilen Slowakiýanyň paýtagty Bratislawdaky kärhana meşgullanar.
Volkswagen kompaniýasy täze ýygnaýjy kärhananyň gurluşygyny Izmir türk şäheriniň ýanynda meýilleşdirdi. Ol ýerde konsern Passat we Skoda Superb hususy modellerini öndürmegi göz öňünde tutdy. Täze kärhana Ýakyn Gündogaryň we Gündogar Ýewropanyň bazarlarynda bu awtomobillere bolan ýokary islegi kanagatlandyrmalydy.
Kompaniýanyň ýolbaşçylygynyň meýilleşdirişine görä, önümçilik meýdançasy ýylda 300 müň sany täze awtomobili çykarmalydy we Türkiýäni 4 müň iş orny bilen üpjün etmelidi. Geçen ýyl gurluşyk birnäçe gezek süýşürildi, häzir bolsa Volkswagen bu pikirden doly boýun gaçyrdy.