Irki barlaglara esaslanmak bilen, alymlar D witaminiň pes derejesi bilen dem alyş ýollarynyň güýçli infeksiýalaryny tiz kabul edijiligiň arasynda baglanyşyk bar diýip belleýärler. Bu barada popmech.ru habar berýär. Täze barlagyň esasynda olar D witaminiň ak gan ösüntgileriniň reaksiýasyny olara COVID-19-yň agyr görnüşi bolan syrkawlarda artykmaç bölünip çykýan sitokin diýlip atlandyrylýan molekulalary köp çykarmaga ýol bermän, sazlaýandygyny görkezdiler.
Italiýada we Ispaniýada koronawirus bilen ölmek howpunyň ýokary derejesi bellige alynýar, täze geçirilen barlaga laýyklykda, ýurtlaryň ikisinde-de Demirgazyk Ýewropanyň köp ýurduna garanda, D witaminiň ortaça derejesi pes.
Alymlar munuň bir tarapdan, Günorta Ýewropadaky adamlaryň, esasanam, gartaşan adamlaryň, güýçli Günden gaçýandyklary bilen düşündirilýändigini belleýärler. D witaminiň derejesiniň iň ýokary görkezijisi Demirgazyk Ýewropada bellige alynýar, bu balyk ýagynyň we D witaminiň goşmaça peýdalanylmagy bilen baglydyr, şeýle-de munuň bu ýurtdaky adamlaryň Günüň aşagynda gezmekden kän gaçmaýandyklary bilen bagly bolup biler.
Barlag geçirijiler D witaminiň ýiti respirator kesellerinden goraýandygyny, koronawirus bilen keselleýänleriň esasy topary hasaplanýan garry adamlaryň bolsa D witaminiň iň pes görkezijisine eýedigini belleýärler. Ozalky barlaglar keselhanalardaky we garrylar öýündäki adamlaryň 75%-inde D witaminiň ýetmezçilik edýändigini görkezdi.
Belläp geçsek, D witaminini alymlar ilkinji gezek 1922-nji ýylda rahit keselini öwrenenlerinde ýüze çykarýarlar. Soňrak hünärmenler D witaminiň Gün şöhlesiniň täsiri esasynda jemlenýändigini anykladylar.
