7-nji maýda Türkmenistanyň Daşary işler ministrliginde sanly wideoaragatnaşyk boýunça Azerbaýjan Respublikasynyň, Gruziýanyň we Rumyniýanyň hünärmenleriniň gatnaşmagynda iş duşuşygy geçirildi. Onda Hazar deňzi — Gara deňiz halkara üstaşyr we ulag geçelgesini döretmek hakynda dört taraplaýyn hökümetara ylalaşygyň taslamasy ara alnyp maslahatlaşyldy.
Türkmen tarapy şol taslamany durmuşa geçirmek, şeýle hem ykdysady, logistika we beýleki degişli ugurlary ara alyp maslahatlaşmak hem-de tehniki meseleleri öwrenmek üçin bilermenleriň derejesinde iş toparyny döretmek boýunça zerur çäreler barada teklipleri taýýarlady.
Daşary ýurtly bilermenler iri ulag-logistika merkezi hökmünde Hazar sebitiniň wajyp ornuny bellediler. Nygtalyşy ýaly, Hazar we Gara deňizleriniň sebitleriniň bir bitewi ulag geçelgesine birleşdirilmegi ykdysady hyzmatdaşlygy, önümçilik we energetika, söwda, maýa goýumlary ulgamlaryny ösdürmek üçin uly mümkinçilikleri açýar.
Hazar we Gara deňizleriniň ulag-üstaşyr geçelgesini döretmegiň taslamasy maslahatlaşyldy
- 08.05.2020 12:04
- 2.1k+
