Ispaniýanyň JIÖ-niň pese gaçyş derejesi 1995-nji ýyldan bäri maksimal bolmak bilen 5,2%-e barabar boldy

Şu ýylyň birinji çärýeginiň jemi boýunça Ispaniýanyň jemi içerki önümi koronawirus ýaýrawy sebäpli 5,2% pese düşdi. Bu barada döwletiň Milli statistik institutynyň saýtynda habar berilýär, muny yandex.ru belläp geçýär.
Bu 1995-nji ýylda hasabat girizilip başlanandan bäri görkezijiniň maksimal pese gaçyş derejesidir, ol hem mart aýynyň ortalarynda COVID-19 koronawirus infeksiýasynyň ýaýrawynyň öňüni almak boýunça çäreleriň girizilmegi bilen şertlendirilýär. Geçen maliýe çökgünliginiň “tutaşan wagtynda” ýurduň JIÖ 2019-njy ýylyň birinji çärýeginde 2,6% pese düşdi.
Şu ýylyň ýanwar-mart aýynda 2019-njy ýylyň degişli döwri bilen deňeşdirilende JIÖ-iň pese gaçyş derejesi 4,1%-e barabar boldy.
Analitikler pese gaçyş derejesiniň ortaça çärýek aňlatmasy boýunça 4,4%, ýyllyk aňlatmasy boýunça 3,2% bolmagyna garaşypdylar, bu barada Trading Economics habar berýär. “The Wall Street Journal” neşiriniň respondentleri pese gaçyşyň degişlilikde 4,4% we 2,9% bolmagyna garaşdylar.
Şol bir wagtda Ýewropa Bileleşiginiň standarty boýunça göz öňünde tutulan Ispaniýanyň alyjylar bahasynyň indeksi aprel aýynda ýyllyk aňlatmasy boýunça 0,6% pese düşdi. Mart aýy bilen deňeşdirilende bahalar 0,4% ýokarlandy.
Ekspertler ýyllyk deflýasiýa 0,8% derejede, aýlyk inflýasiýa 0,2% derejede bolar diýip çakladylar. Mart aýynda bahalaryň ösüşi ýyl boýunça 0,1%, aý boýunça 0,6% boldy.
Belläp geçsek, Fransiýanyň hem JIÖ 2020-nji ýylyň birinji çärýeginde 5,8% pese düşdi. Bu barada Insee fransuz milli statistik institutynda habar berdiler. Bu gözegçiligiň tutuş taryhynyň dowamynda maksimal pese gaçyş boldy.