Türkmenistanda ýokanç däl keselleriň öňüni almak boýunça täze maksatnama taýýarlanylýar

29-njy aprelde Aşgabatda ýerleşen BMG-niň wekilhanasynyň binasynda wideomaslahat geçirildi. Onlaýn-duşuşygyň esasy maksady Türkmenistanda Ýokanç däl keselleriň öňüni almak we olaryň garşysyna göreşmek boýunça 2021-2030-njy ýyllar üçin täze maksatnamany işläp taýýarlamak, öňde goýlan wezipeleri çözmek maksadynda tejribe alyşmak hem-de umumy tagallalary birleşdirmek üçin möhüm ugurlary kesgitlemek bilen bagly meseleleri ara alyp maslahatlaşmakdan ybaratdyr.
Oňa Bütindünýä Saglygy goraýyş guramasynyň Ýewropa sebiti boýunça edarasynyň bilermenleri hem-de ýurdumyzyň Saglygy goraýyş we derman senagaty ministrliginiň wekilleri gatnaşdylar.
Türkmenistanda ýokanç däl keselleriň öňüni almak hem-de olaryň garşysyna göreşmek boýunça Aşgabat Jarnamasyny ornaşdyrmak babatda 2014 — 2020-nji ýyllar üçin kabul edilen Milli maksatnamada olary öz wagtynda ýüze çykarmak boýunça çäreleri güýçlendirmek göz öňünde tutuldy. Bu işler BSGG-niň Ýewropa sebiti boýunça edarasynyň goldaw bermeginde häzir hem dowam etdirilýär.
Ýeri gelende aýtsak, Prezident Gurbanguly Berdimuhamedowyň tabşyrygy boýunça ýurdumyzda 2021 — 2030-njy ýyllar üçin täze maksatnamany we hereketleriň meýilnamasyny işläp taýýarlamak üçin Ýörite işçi topary döredildi.