Türkmenistan we ÝUNISEF çaga hukuklaryny üpjün etmegiň meselelerini maslahatlaşdy

27-nji aprelde DIM-de ýurdumyzdaky BMG-niň Çagalar gaznasynyň (ÝUNISEF) wekilhanasynyň baştutany hanym Kristin Weýgand bilen duşuşyk geçirildi. Duşuşygyň barşynda ýurdumyz bilen ÝUNISEF-iň arasynda hyzmatdaşlygy ösdürmek meseleleri ara alnyp maslahatlaşyldy.
Duşuşygyň barşynda şeýle hem bilimiň, saglygy goraýyş, durmuş goraglylygy we adatdan daşary ýagdaýlara taýýarlyk ulgamlarynyň sanlaşdyrylmagy boýunça pikir alşyldy. Ýurdumyzyň Durnukly ösüş maksatlaryna ýetmek ýolunda çaganyň hukuklaryny üpjün etmek we durmuşa geçirmek babatynda alyp barýan işleri ara alnyp maslahatlaşylan meseleleriň biri boldy.
Türkmenistan iş ýüzünde ösüp gelýän nesliň sazlaşykly kemala gelmegi üçin aňrybaş amatly şertleriň üpjün edilmegine jogapkärli çemeleşmäni görkezýär, olaryň saglygy we abadançylygy baradaky alada döwlet syýasatynyň möhüm ugry bolup durýar. Ýurdumyzyň bu ulgamda ýeten sepgitleri BMG-niň Çagalar gaznasynyň ýokary bahasyna mynasyp bolýar.