Ýumurtga organizme nähili täsir edýär?

Ýumurtgadan taýýarlanylýan tagamlar dünýä aşhanasynda mynasyp orun eýelemek bilen diňe bir iýmegi gowy görýänleriň däl-de, eýsem, wagtyny aşpezlige sarp etmegi halamaýanlaryň hem ýörgünli ertirligine öwrüldi. Onuň düzümine girýän belok türgenleriň we öz figurasy barada alada edýänleriň arasynda-da meşhur boldy.
Ýumurtganyň oňaýly taraplary. Ýumurtga – iýmitlendiriji mikroelementleri we maddalary özünde jemleýän özboluşly iýmit. Onuň belogynyň özüniň peýdasy boýunça balygyňkydan we etiňkiden öňe geçýändigini bilýän az-azdyr.
Ýumurtgada nerw merkeziniň işine oňaýly täsir edýän ýarym witamin holin, şeýle-de özüniň antioksidantlary bilen tanalýan selen we lýutein saklanýar. Ýumurtga göreje gowy täsir edýär we kataraktanyň hem-de gözde ýaşyň ulalmagy bilen bagly bolup geçýän üýtgeşmeleriň öňüni alýar. Bu barada Sputnik portaly habar berýär.
Iýmitiň düzümine girýän E witamini gan aýlanyş damarlarynyň we ýürek sistemasynyň saglygyna gözegçilik edýär, A witamini immunitetiň işine jogap berýär, D witamin dişiň we süňküň üçin peýdaly. Ýumurtga organizmi energiýa bilen doldurýan proteine baý. Şonuň üçin ony ähli türgenleriň rasionyna goşmagy maslahat berýärler.
Ýumurtganyň ýokary derejeli holesterin sebäpli saglyga zyýan ýetirip bilýändigi barada hem pikir bar, ýöne ol örän jedelli. Köp dietologlar ony irdenki rasiona goşmagy we witaminleriň uly möçberini, şeýle-de kalsiýni, fosfory, sinki we demiri saklaýan ýumurtga sarysyndan gorkmazlygy maslahat berýärler. Bularyň ählisi saçyň, dyrnaklaryň we deriniň ýagdaýyna oňaýly täsir edýär.
Ýumurtganyň otrisatel taraplary. Ýumurtga gereginden artyk möçberde kabul edilen ýagdaýynda zyýan ýetirip bilýär. Çendenaşa kabul edilen ýagdaýynda (günde 2 ýumurtgadan köp) olar ganyň düzümindäki ýaramaz holesteriniň derejesini ýokarlandyryp bilýärler. Çig ýumurtgany (towuk) çendenaşa kabul etmeklik organizmi guratma we hatda böwrek ýetmezçiligine getirip bilýär.
Bir zady bellemeli, dükanlarda satylýan ýumurtgalar içege mikroflorasyna zyýan ýetirýän we kesel dörediji mikroorganizmleriň köpelmegine ýardam edýän antibiotik we nitrat ýaly zyýanly maddalary saklap biler. Şonuň üçin olary belligine we möhletine seredip almaly.