Italiýada kenarýaka möwsümine taýýarlanyp başladylar

Häzirki wagtda Italiýada eýýäm bir aý wagt bäri berk karantin hereket edýär, ony azyndan 3-nji maýa çenli dowam etdirmek göz öňünde tutulýar.
Koronawirus ýagdaýyna seretmezden, Italiýada kenarýaka möwsümini açmaga taýýarlanýarlar, bu barada aif.ru ýurduň medeniýet ministriniň orunbasaryna salgylanmak bilen habar berýär. Onuň aýtmagyna görä, bu ýylda italýanlar deňizde dynç alyp bilerler. Howpsuz dynç alyş üçin hökümet birnäçe çäreleri işläp taýýarlaýar.
Hususan-da, şezlonglary bronlamak hyzmatyny girizmek bilen olaryň sanyny azaltmak warianty gözden geçirilýär. Howpsuz distansiýany üpjün etmek üçin şezlonglary biri-birinden 10-14 metr daşlykda ýerleşdirmek göz öňünde tutulýar. Mundan başga-da, garry adamlar üçin kenarda bolmagyň hem ýörite wagt aralyklary girizilip bilner.
Kenar enjamlary, çäge we umumy ulanylyş ýerleri yzygiderli dezinfeksiýa edilip durlar. Köpçülikleýin çäreler ýa-da oýunlar üçin meýdançalar bolmaz. Restoranlardan, barlardan we kafelerden hem köp gezeklik gap-gaçlaryň aýrylmagy mümkin. Şeýle-de, hökümet kenara degişli esbaplary kireýne almagy gadagan etmeli bolar.
Mundan başga-da, dynç alyjylara pleksiglasdan (organiki çüýşe) edilen ýörite “kabinkalar” garaşýar, olaryň içinde şezlonglaryň aralygy 1,5 metrden az bolmaz. Plýažda gorag maskalaryny dakynmak meselesi heniz çözülenok. Rim hassahanasynyň ýokanç keselleriniň professory möhüm howpsuz aralyk üpjün edilen ýagdaýynda maskalaryň gerek bolmajagyny belleýär.
“Corriere della Sera” gazeti şu tomusda Italiýa 25 million daşary ýurt syýahatçylaryny ýitirip biler, şonuň üçin ýurduň içindäki dynç alyşa bil baglanylýar. Belläp geçsek, Italiýada ýagdaý ýuwaş-ýuwaşdan gowulaşýar. 14-nji aprelden ýurtda käbir dükanlar we kärhanalar işläp başlady.