Opel 15 ýyldan soň ýapon bazaryna dolanýar

Opel kompaniýasy heniz General Motors birleşiginiň düzüminde wagty Ýaponiýada satuw işini bes edenden 15 ýyldan soň ýapon bazaryna dolanýandygyny habar berdi. Opel ulaglarynyň öndürilmegi Ýaponiýada 2021-nji ýylda başlanar. Indiki ýyldan ýyldyrym logotipli brend birbada üç sany modeli işe girizer: Ýaponiýada başga ada eýe bolup biljek Corsa bestselleri, köp funksionally Combo Life we Grandland X krossoweri. Beýleki modeller hem ýakyn geljekde peýda bolar diýip, Opel-iň metbugat gullugyna salgylanmak bilen autostat.ru habar berýär.
Ýapon satyjylaryna Opel içinden otlanýan elektrik we klassyky hereketlendirijileri islege görä saýlama üçin hödürläp biler. Içinden otlanýan hereketlendirijiden başga-da, Corsa bitewi elektrik wersiýa hem eýe bolar, Grandland X bolsa gibrid görnüşinde hem elýeterli bolup biler.
Ýaponiýada Opel Groupe PSA Milli Satuw Guramasynyň bir bölegi bolar we lokal infrastruktura hem-de Toparlary döretmäge ygtyýarlyk gazanar. Bu bolsa gürrüňi edilýän bazara dolanmaklygy ep-esli ýeňleder. Ýakyn aýlarda brend ýurduň iri şäherlerinde diler toruny gurar, soňabaka ol giňeldiler. 2023-nji ýyla çenli Opel tory ýapon bazarynyň 80%-ni tutar.
Häzirki wagtda Ýaponiýada Groupe PSA (Awtomobil gurluşyk kompaniýasy) Peugeot, Citroen we DS brendleriniň eýesi hasaplanylýar. 2019-njy ýylda satuw 15,6 müň awtomobile barabar boldy. Opel brendiniň işe girizilmegi Groupe PSA-a sebitdäki täsirini artdyrmaga we täze müşderileri özüne çekmäge kömek eder.
2020-nji ýyllaryň ortalaryna çenli brendiň satuw möçberiniň 10%-i daşky bazarlara degişli bolar. Bu maksada ýetmek üçin brend Aziýanyň, Afrikanyň we Günorta Amerikanyň bazarlarynda öz ornuny berkider we 2022-nji ýyla çenli 20-den gowrak täze sebitlere çykar.
Ýatladyp geçsek, öndüriji ýapon bazaryndan 2006-njy ýylda gidipdi. Munuň sebäbi öndürilýän ulaglaryň möçberiniň birden peselmegi, şeýle-de has isleg bildirilýän we şol bada meşhur bolan beýleki brendleriň ýüze çykmagy boldy.