«Realme» ilkinji smart-telewizorlaryny hödürlemäge taýýarlaýar

Internet çeşmeleriniň maglumatlaryna görä, Realme kompaniýasy bazara Internete birikdirmek mümkin bolan «akylly» telewizion panellerini çykarmaga taýýarlanýar.
Ýatladyp geçsek, Realme hytaý firmasy smartfonlary öndürýän belli kompaniýalaryň biri hasaplanylýar. Bu brend 2018-nji ýylyň maý aýynda resmi taýdan tanyşdyryldy.
Kompaniýanyň assortimentinden Realme X, Realme X Master Edition, Realme XT, Realme X50 5G ýaly mobil enjamlaryny belläp geçmek bolýar.
Realme kompaniýasynyň bazara «akylly» telewizorlary çykarmak boýunça meýilnamasy barada kompaniýanyň marketing boýunça müdiri (CMO) Frensis Wan gürrüň berdi.
Onuň aýtmagyna görä, Realmeniň ilkinji smart-telewizorlary Ispaniýanyň Barselona şäherinde 24-27-nji fewral aralygynda geçiriljek mobil senagatynyň «Mobile World Congress (MWC) 2020» sergisinde görkeziler.
Taýýarlanylýan panelleriň tehniki häsiýetleri baradaky maglumatlar häzirki wagtda, gynansak-da, ýok. Ýöne onuň göwrümi diagonallygyna 40-50 dýuýmdan az bolmaz diýip çaklamak bolar.
Realmeniň smart-telewizorlary ösen bazarlaryň ählisinde elýeterli bolar. Onuň satuwyna, ähtimal, üstümizdäki ýarymýyllykda başlanar.